Suliniuteqarfissami " Attaveqaasersuutit " -ni sammineqarpoq piujuartitsinermik tunngaveqarluni inuussutissarsiutinik ineriartortitsinissaq aamma mingutsitsinngitsumik nukissiuuteqarnermut ikaarsaarneq, kiisalu kommunimi atortulersuutinik aamma digitaliusunik nukittorsaaneq. Anguniarneqarpoq siumukarnerup suliffissallu pilersinnissaat piujuartitsinermik tunngavilinnik allartitsisarnikkut, soorlu mingutsitsinngitsumik nukissiuutit aamma teknologi avatangiisinut uloriananngitsoq, kiisalu inoqarfiit akornanni digitali atorlugu attaveqaqatigiinnerup pitsanngorsarnissaa. Tamatuminnga suliniuteqarnerup qulakkiissavaa innuttaasut inuussutissarsiortullu digitalikkut attaveqaasersuutinik patajaatsunik qulakkeerunneqarnissaat, ilinniartitaanermik, peqqinnissamik inuussutissarsiutitigullu periarfissanik ikorfartuisunik, piujuaannartitsinermik alimasissumullu eqqarsarnermik tunngaveqarluni aningaasalersorneqartunik.
Kommunimi pilersaarummi makku suliarineqassapput:
- Illoqarfinni Qasigiannguani Qeqertarsuarmilu nunaminertanik mittarfiliorfigineqarsinnaasunik immikkoortitsioqassasoq.
- Kommunimut pilersaarummi nunaminertanik immikkoortitsisoqassaaq, Qasigiannguit eqqaanni erngup nukissiorfiliassamut, Qasigiannguani Aasiannilu sakkortusaavinnut (transformerstationit), nunaminertallu innaallagissap aqqutaas ledningit aqqutissaannut, teknikkikut atortulersuutaat ilanngullugit.
- Kommunimut pilersaarummi Aasianni nunaminertamik immikkoortitsisoqassasoq attaveqaatinik tigooqqaaviup/nassitsioraaviup (parabol)-ip inissaanik. attaveqaatitigut piorsaanissamut atugassamik.
- Inuussutissarsiutinik ineriartortitsinissamik siunertaqartumik nunaminertanik immikkoortitsisarnerup kommunimut pilersaarummi ukkatarineqarnissaa.
Immikkoortortanut suliassani makku ukkatarineqassapput:
- Inuussutissarsiutinik ineriartortitsineq ilanngullugu takornariartitsisarnerup iluani suliffissatigut periarfissat.
- Atoqqiisarneq iluaqutigalugu aningaasaqarnermik piujuaannartitsinermik tunngavilimmik inerisaaneq.
Kommune Qeqertalimmi kommunimut pilersaarummi 2025-2037-imi innuttaasut siunnersuutaat ilaatinneqassapput:
- Attaveqaasersuutinik pitsaasunik inerisaanermi innuttaasunik peqataatitsineq, ilaatigut suluusalinnut mittarfiit sumiiffissaat, piujuaannartitsineq avatangiisinullu innarliinngitsumik nukissiuuteqarneq atoqqiisarnermillu tunngaveqarneq eqqarsaatigalugit.