Kommune-mi inuussutissariortunut inussiarnernerup qulaajarneqarnerani Business Council sutigut tamatigut suleqatigalugu pissaaq. Inuussutissarsiortunik soqutinnittut pingaanerpaat peqatigalugit aamma attaveqartarfiit atorlugit ataatsimiisitsisarnikkut inuussutissarsiortutut sulinianerit qulaajarneqassapput kiisalu Kommune Qeqertalimmi namminersortunngorniartunut startpakke –p atuutilersinneqarsinnaanissaa sulissutigineqarlunilu misissorneqassaaq, taamaaliornikkut namminersortunngorniartut oqinnerusumik pilertornerusumillu aallartissinnaanissaat qulakkerniarneqassammat. Inerisaanermut tunisassiornermullu akornutaasartoq tassaavoq pitsaasumik sulisinnaassusillit amigaataaneri aamma taakkua misissorneqartassapput sulisinnaasut kajungilersinniarlugit. Immikkoortortat pillugit pilersaarutit pitsaanerusumik takussutissiaralugit aamma saqqummiussisoqartassaaq. Taakkua tunngavigalugit Kommune –mi sanaartorfigissaanerit siunissaq ungasinnerusoq eqqarsaatigalugu suliarineqassapput. Immikkoortortat pillugit pilersaarutit takussutissiartaasa katitigaaneri eriagisassatut naleqartillugit aamma tunngavigineqassapput, taakkualu takornariaqarnerup ineriartortinneranut iluaqutissiarineqassammata.
Piniarneq aalisarnerlu.
Piniarneq aalisarnerlu pillugit politikki pilersinneqassaaq. Nalitsinni aalisartuuneq piniartuunerlu inuussutissarsiutaavoq pingaarutilik aammalu kulturitsinnut toqqammaviliissuvoq. Tamanna toqqammavigalugu aalisarnikkut piniarnikkullu atugassarisitaasut Kommune Qeqertalimmi pitsaasuunisaat sulissutigissuarput, umiatsialiveqarnikkut, amutsiveqarnikkut, neqitsersuiarfeqarnikkullu, illoqarfinni nunaqarfittatsinnilu tulleriiaaraluta pitsanngorsaassuugut. Kulturitta ataannarnissaanik qulakkeerinnittumik piffinni piniarnikkut inuussutissarsiuteqarfiusuni nalitta pissarititaanik imminut pilersornermi periarfissarititaasut pitsanngorsassavagut, kalaaliminernik tuniniaaffiusinnaasut pitsanngorsarnerisigut. Imminut pilersorneq siunertaralugu piniartut pisaasa pisortat suliffeqarfiini atorluarneqarnerunissaat siunertaralugu suliaqartoqassaaq. Puisit amiisa tunisaanerisa annertusarnissaat siunertaralugu ameerniartarnermi malitassat nalilersorneqassapput Naalakkersuisooqatigiit qanimut suleqatigalugit.
Kommunimi pilersaarummi makku suliarineqassapput
- Kommunimut pilersaarut pisariitsoq paasiuminartorlu inuussutissarsiortunut iluaqutaasumik.
- Qeqertalimmi kommunimut pilersaarummi 2025-2037-mi QBC-p sunniuteqarnera peqataatinneralu.
- Aalisartunik piniartunillu peqataatitsineq inuussutissarsiummut iluarisimaarnartumik.
- Kommunimut pilersaarummi pisuussutinut uumassusilinnut tamanut malittarisassiornissaq.
Immikkoortortanut suliassani makku ukkatarineqassapput
- Inuussutissarsiutinut tamanut pilersaarutit.
Kommune Qeqertalimmi kommunimut pilersaarummi 2025-2037-imi innuttaasut siunnersuutaat ilaatinneqassapput:
- Suliffeqarfiit kissaatigineqartut inissaanik innersuussineq.