Meeqqat atuarfiat nukittorsarneqassaaq. Meeqqat atuarfiat pillugu ukiuni tulliuttuni siunniunneqartoq ”Siunnerfik” nangeqqillugu sulissutigineqarnissaa isumaqatigiissutigineqarpoq. Ilaatigut imaqartoq meeqqat angusaasa qaffasinnerulernissaanik. Meeqqat atuartut immikkut pisariaqartitsisut ajornannginnerusumik meeqqat atuarfianit naammassilernermi ikaarsariartarnissaat eqaallisarneqassaaq susassaqartut ukuusut suleqatigalugit (Atuarfik – Majoriaq – Suliffeqarfiillu).
Kommunimi pilersaarummi makku suliarineqassapput
• illuutit silataasalu inerisarneqarnissaat pitsanngorsarneqarnissaallu.
• Timikkut tarnikkullu ilorrisimaarnissamut periarfissat pilersinneqarnissaat.
• Inoqarfinni ilinniartitsisut illuinik pitsaasunik atorluarsinnaasunillu pilersitsineq, ilinniarsimasunik sulisussaqarniarneq qulakkeerumallugu.
Immikkoortortanut suliassani makku ukkatarineqassapput
- Siunnerfik.
- Ikaartarfik.
- Nerisaqarneq pillugu politikki.
Kommune Qeqertalimmi kommunimut pilersaarummi 2025-2037-imi innuttaasut siunnersuutaat ilaatinneqassapput:
- Innuttaasut toqqissisimassapput meeqqatik atuariartortikkaagamikkit.