Kommunip nalinginnaasumik ineriartorneranut inuussutissarsiutinik ingerlatsinerup ineriartortinneqarnera aalajangiisuulluinnartuusarpoq. Aalisarnerup iluani, pisuussutit uumassusillit pitsaanerusumik atorneqarnissaat ilanngullugu aamma kommunimi tamarmut takornariartitsinermik ingerlatsisut siannarneqarnissaat aallunneqarnerusariaqarput. Taamatuttaaq isumassarsiat nutaat aamma inussutissarsiornikkut periarfissat tapersersorneqarlutillu siuarsarneqaneqartariaqarput. Najugaqavissut unammillernartunik nutaanik suliaqarsinnaalersinniarlugit ilinniartitseqqiisarneq pingaartillugu aallartinneqassaaq.
Qaasuitsup Kommunia Kalallit Nunaanni kommuninut allanut sanilliullugu inuiaqatigiinni ineriartortitsinikkut attaveqaatitigut, meeqqeriveqarfitsigut assigisaannilu kinguussaaqqavoq. Aalisarneq takornariartitsinerlu kommunimi inuussutissarsiutitut pingaarnertut suli ingerlapput.
Ukiup ingerlanerani suliffissat nikerartorujuusarneri aamma suliffissaaleqinerujussuup kommunep aningaasaqarniarnera navianartorsiortittorujussuuvaa amigartooruteqartittarlugulu. Taamaattumik pingaaruteqarluinnarpoq inuutissarsiutit akilersinnaasunngortillugit ukiuni tullerni inerisarneqarnissaat taamaaliornikkumi aningaasarsiorneq illuatungaanut saatinneqarsinnaalerniassammat.
Periarfissat unammilligassallu kommunimi sumiiffimmiit sumiiffimmut allanngorartuupput. Qaasuitsup Kommuniata suliassaraa, kommunip inoqarfiini nukissat pigineqartut takussutissiornissaat. Tamatumanilu pisariaqartussaavoq nukissat taakku qanoq pitsaanerpaamik atorneqarsinnaanerat nassuiaasiussallugu aammalu inoqarfinni attatiinneqarnissaat, inuussutissarsiutinik ingerlatsineq tamanut iluaqutaasinnaaqqullugu.
Kommunemi inuutissarsiut pingaarnerpaaq – aalisarneq kiisalu aalisakkeriveqarneq – aningaasatigut avatangiisitigullu imminut napatissinnaalluni inuutissarsiutaassaaq. Pisuussutsit uumassusillit atorneqarnissaannik piumasaqaatit suli inerisarneqartarput inuutissarsiullu massakkorpiaq nutarterneqarpoq eqaallisarneqarlunilu.
Inerisaanermi angallatit nutarterneqarput eqaannerusumik suliffiusinnaasunngorsarneqarlutik anginerulersinneqarlutillu. Ileqquusumik umiatsiaaqqanit aalisarneq tamatumanit ilungersunartorsiortinneqarpoq. Tamanna taamaakkaluartoq, illoqarfinni nunaqarfinnilu aalisarnikkut tunisassiorfiit ineriartornissamut periarfissaat pitsaasut naammaginartullu qulakkeernissaat suli ingerlanneqartariaqarpoq.
Pisuussutsit uumassusillit atorluarneqarnerunissaat pikkoriffiginerusariaqarparput tunisassiallu nutaat suliarineqartarneri inerisaaffigeqqinnerisigut tamanna pisinnaavoq. Tunisassiagut – qaleralik, raja il.il. – nunarsuarmi pitsaanerpaatut ilisimaneqalereerput. Amerlanerusunik nutaanillu tunisassiornissarput eqqarsaatigilertariaqarparput.
Kommunimi tamarmi inuussutissarsiortut atugaannik pitsanngorsaanerit ingerlaavartumik pisassapput. Soorlu assersuutigalugu Ilulissat illoqarfiata ineriartortinneqarnissaanut pilersaarusiaq aqqutigalugu nunaminertat inuussutissarsiortunit atorneqarsinnaasut immikkoortinneqartassapput, taakkunani ineriartortitsinissamut periarfissat pitsanngorsarneqassapput iluatigalugulu illoqarfiup qeqqata atorneqarpallaarunnaarsikkiartorneqassalluni.
Nunarsuaq tamakkerlugu silap kissatikkiartornera taassumalu ukiuni kingullerni tallimani sammineqaleriartornerata kingunerisaanik Kalaallit Nunaata kitaata avannaa ilisarineqaleriartortippaa tamatuma kingunerisaanik takornarissat nutaat tikeraartalerput kommunemullu isertitaqaataasarlutik.
Takornariartitsineq inuutissarsiutinut Kalaallit Nunaata avannaata kitaani ineriartinneqarsinnaalluartunut ilaavoq. Qeqertarsuup eqqaani ukiuni arlaqalersuni tutsuiginarluinnartumik misilittagaqartoqalereerpoq takornariartitsisarnerlu inuutissarsiutigineqalereerluni.
Silaannaap allanngoriartornera tunngavigalugu atorluaasinnaanermut takornariartitsisarneq assersuutaalluarsinnaavoq taassumami malitsigisaanik inuutissarsiutit nutaat pilersiortorneqarsinnaalluarmata.
Ilulissani Kangiata illorsuanik pilersitsinissap aamma mittarfiup allilerneqarnissaata ilimanarsisippaat, takornariartartut amerlassusiisa, kommunimut tikerartartut, amerleriarujussuarnissaat. Takornariartartunut atatillugu suliniutit minnerusut aamma aallunneqartariaqarput, soorlu assersuutigalugu illoqarfimmik kusassaaneq aamma tikinnermi periarfissat pitsaanerusut, kommunip ilaata sinneranut takornariaqarnerulernermik kivitseqataasussat.
Takornariartitsineq siunissami inerisarneqassappat tikeraat ukioq naallugu tikeraartigisarsinnaanissaat unammilligassat ilagissavaat aamma tikeraat avannarpasinnerusunut takornariartillugit takornarniartittarnissaat unammillernartuussalluni. Periutsit nutaat nutaaliarineri ineriartortinnerilu aamma inuussutissarsiutit ineriartortinnissaannut takornariartitsinermullu naalakkersuinikkut anguniakkat kommunip siunissami periusissaanut ilaasinnaapput.
Sermersuup erngullu tunisassiarineqarneri eqqarsaatigalugit tunisassiat nutaat pilersinneqarsinnaanerinut assersuutaalluarput taakkumi inuutissarsiutinik inerisaanermik tutsuiginarluinnartumik pilersitsinerup takussutissartarai. Qeqertarsuarmi sisorartarfissaq assersuutissaavoq, pissutsit pioreersut qanoq atorluarsinnaanerigut aamma takornariartitsinermi suliaqarnitsinni qanoq nutaamik eqqarsarsinnaanersugut.
Innuttaasut namminneq suliffeqarfiussaminnik allartitserusulernissaat aallartitsinissaallu Qaasuitsup Kommunianit kajumissaarutigineqarusuppoq. Ullumikkornit amerlanerusunit suliffeqarfinnik aallartitsisoqartariaqarpoq. Taamaattumik kommunep inerisaanissaq anguniarlugu siuttoorusuppoq aallarnissanermilu siunnersortaarusuppoq; siuarsaaneq nutaamillu eqqarsarneq ataatsikkoortillugit ilisimasanik avitseqatigiiffiusarmata namminersorlutillu inuutissarsiuteqartunit assigiinngitsunik suleqatigiilersitsisarmata – suliffeqarfiit, naalakkersuinermik suliaqartut aamma Kommune suleqatigiittarput.
Qaasuitsup Kommunia matumani pingaaruteqarluinnartumik suliassaqarpoq; suliffeqarfiit pisariaqartitaannik najugaqarfigisami inuutissarsiortunit paasissutissanik ingerlatitseqqiisarnissaminik isumasioqatigiittussanik aallartitsisarnissaminik, ilinniartitseqqiisarnissaminik assigisaannillu suliaqarnissaminik.
Ilinniartitaaneq, piginnaasanik pitsanngorsaaneq ilinniartitsinerlu malunnaateqarluartumik aningaasaliffigineqartariaqarput, taamaaliornikkummi najukkani ataasiakkaani inerisaaneq iluaqutigissavarput – siunissaq qaninnerusoq ungasinnerusorlu eqqarsaatigalugit.
